A Chanve A Awm Nge, A Chanve A Phai?
Tukverh pakhatah mi pahnih an dak chhuak a, pakhat chuan Ngaw dur pik tak mai a hmu a, pakhat zawk vethung erawh chuan Van thiang taka arsi eng mawi tak awm dial dial a hmu thung - Ziaktu Hriat Loh
Hringnun nghawngkawl bat tura khawvel eng rawn chhim hringfa zawng zawngte hian a tha zawnga thil kan thlir thiam a pawimawh takzet! Engkim mai a tha zawnga thlir thiamte hi mi vannei berte an ni ti ila a sual tampui awm love. A pik zawng ringawta thil thlir thinte tluka mi vanduai hi an awm ka ring meuh lo.
Khawvel hi kan duh dan ang taka duan lawk-sa a ni lova, khawvel awmsa-ah tungchhovin kan lo piang ve mai a ni a. Chuvangin kan duh danin engkim hi a awm thei lo va, kan thu thu leh tha kan tih danin a
awm thei na hek lo. A changin hreawmna tinrengin min bawm a, a changin kan nuam ve leh zawk thin a. Chu chu khawvel kalphung leh leilung dan a ni tlat! Tui taka kan mut lai emaw, tui vak lova kan mut lai te pawhin chu chuan min uap betin min delh reng a ni.
Tuithawl-a tui awm zat chu pa pakhat chuan, “A Chanve A Phai ” a ti a, pakhat zawk chuan, “A Chanve A Awm ” a ti thung! Kan thil thlir dan hian min hruai zel thin.
Nang teh, tuithawla tui awm zat chu, “ a chanve lai a phai / a kim lo/ a chaive laiin a kim tawh lo...” ti zawnga thlirtu nge i nih a, “ A chanve lai a awm...” ti zawnga thlirtu zawk le?
