FOREST MINISTER KUT-AH SAPELNA HMANRUA HLAN

Pu M.C.Zathuama, S.Lungpher khua chuan kum 20 chhung eizawnna pui bera a lo neih sapel bansanin vawiin khan Environment & Forest Minister Pu H.Rohluna kutah silai leh thang thahnem tak a hlan.

Minister hova Environment & Forest department officer ten E&F conference hall-a vawiina meeting an neih-ah Pu Zathuama hian sapelna hmanrua, airgun-1, sairawkherh-1 leh thang chi hrang hrang 87 te chu Pu Rohluna kutah hian hlanin kum 1989 atanga eizawn nana a lo hman, sapel hna chu kum 2008 atang khan chawlhsanin tun atang chuan nungcha te humhalh kawngah theihtawp chhuah tawh zawk turin a intiam a. A hmanruate hi midang in an hman zui loh nan Forest department kuta hlan a ni tih sawiin midangte zirtirtu pakhat tal a nih ve ngei a beisei thu a sawi a ni.

Vawiin-a meeting ah hian Pu Rohluna chuan Environment & Forest department tan lak thar lehna tur pawimawh deuh deuh te tarlangin officer te fuihna thu a sawi a. Nungcha leh ramngaw humhalh chungchangah  department hnuaia territorial leh wildlife hna enkawltu ten thawh hona tha an neih a pawimawh hle tih sawiin Forest department sawiselna, chanchinbu a lo lang thin te chu department tan inenfiahna tur a ni, a ti bawk.

Meeting hi Dr.S.S.Garbyal, PCCF-in a kaihruai a. Forest department hnuaia Division, Range leh Beat hrang hrang ramri chungchang te, NLUP hnuaia hmalakna tur chungchang te, department hmachhawp hrang hrangte leh thil pawimawh dangte sawiho a ni.

Thulakna: DIPR