MALAYSIA MIZOTEN MCF DAY VAWI 5-NA HMANG DAWN

Mizo Christian Fellowship (MCF), Malaysia piancham vawi 5-na hmang turin Malaysia-a Mizo chengte an inpuahchah mup mup mek. MCF Day hi ni 29 leh ni 31 August 2010 hian an hmang dawn a.Ni 29, Chawlhni hian KLBC , Kuala Lumpur-ah Pathian biak inkhawm inpawlhona an nei ang a, ni 31, Thawhlehni-ah Imbi khelmual – Kuala Lumpur-ah  infiamna chi hrang hrang hmanga intihhlim inpawlhona  an nei ang.

Malaysia-a cheng Mizote hian a hranpa takin Mizo kut te an la hman ve theih loh avangin MCF Day hi hnam ni ve tura min lo dintu kan Pathian chawimawi chungin, Mizo hnamthuam leh silhfen inbela inchei nan te, Mizo hnam lam entir nan te, Mizote inhmuhkhawmna hunpui angrengte-in an hmang thin.Ni 27 July atang tawh khan MCF lanu valrualten ni 31 August-a lam tur Mizo hnam lam ‘Sarlamkai’ leh ‘Zawlkhawsir Lam’ ngawrh takin an zir mup mup tawh a ni.

MCF Day hi Kuala Lumpur chhung mai ni lo, khaw danga awm Mizote pawhin an hlutin an ngai pawimawh hle a, he Day-a football khel tura inpe pawh team 8 meuh an tling thei a ni.

Malaysia-ah hian Mizo hnahthlak mi 50000 vel an awm nia hriat a ni a, ‘Mizo’ hming chawi insuihkhawm pahnih Mizo Christian Fellowship leh Malaysia Mizo Community-a lawi hi mi 1200 vel nia chhut a ni.

MCF hi KL khawchhung mai ni lo, khaw dangah pawh branch dang a ding ve nual a, an rawngbawltu hi Rev.Lalthuamluaia a ni. Ani hi Burma ram Mizo kohhran hlun ber leh lian ber Methodist kohhran minister a ni.

MCF Day hmang tur hian Mizo zawng zawng sawm an ni.