Mizoram-in Tuikuk (Bru) Kang Tuarte Tanpui Dawn

Ni 21 March 2011 tlai dar 3:30 khan Home Minister Room-ah Naisingpara Bru Refugee Camp kang chungchangah Home Minister Pu R. Lalzirliana hovin PHE Minister Pu S. Hiato; UD & PA Minister Pu Zodintluanga; Dy. Speaker Pu John Rotluangliana; Parliamentary Secretaries Pu Lal Thanzara leh Pu Lalrinmawia Ralte; MLA Pu John Siamkunga; Chief Secretary Pu Vanhela Pachuau; Home Commissioner Pu Lalmalsawma leh Pi Rita L. Pachuau, DM & R te thukhawmin, eng anga tanpuina pek ve chi nge ni ang tih sawihona neih a ni a. Chhungkaw tinte mut puan a tanpuina pek nise tih an rel a. DM & R atangin lo lei khawm a, Mamit DC in a pek lo tum se tih rel a ni. - DIPR

Hriat kawp atan:-

In 2,500 kângah mi 17 an kâng hlum

March 19, Inrinni chawhma dar 11:30 vel khan Tripura-a Tuikuk raltlante awm khawmna pakhat, Naisingpara-a relief camp a kâng a, in 2,500 vel kângin, mi 17 a kâng hlum.

Naisingpara-a mi, A Sawibunga sawi danin, kângmei hi relief camp sir atangin a chhuak a, camp chhunga in tam tak a man kai nghal a ni. Mihring kâng hlumte hi a tam zawk chu upa lam leh nau pawm an ni a, naupang pali an tel bawk. Mi 12 vel an hliam na zual a, an zinga pali chu Agartala-ah enkawl turin helicopter-a phurh an ni.

Kângmei vanga in nei lote hi hall, biak-in, sikul leh hmun remchangah dahkhawm an ni a, nimin khan Tripura Chief Minister, Manik Sarkar chuan a hmunah a tlawh. Inrinnia kâng hlum mi 16-te chu Inrinni leh Pathianni khan an phûm a; hliam zinga hmneichhe pakhat chu nimin khan a thi a ni.

Kângmei chhuak hi thli a thâwt nasat avangin thelh mih a har hle nia thudawn a ni a, tlai dar 4 velah an thelh mit theih chauh a ni. - Vanglaini