Ruah, Leimin Leh Tuilianin State Thenkhat Tibuai
Assam leh Arunachal Pradesh-ah chuan ruah tam tak a sur avanga leimin, tui lian leh a kaihhnawihah mi 10 vel an thi tawh a, mihring 3,00,000 vel chu in nei loin an awm. Ruah sur, leimin leh tui lian hian Arunachal Pradesh-ah chuan district thum a nghawng a, lei te, rap in te, school te tui lian chuan a lenchhia a, thlai (agriculture crop) tamtak a tichhia.
Arunachal Pradesh-ah hian leimin avanga in chhhiah mi 8 an thi tawh a, kawng tamtak a chhe bawk. In tamtak leiminin a hnawl leh delhchhiat a awm.
Assamah chuan ni thum chhung tui lianah mi 2 an thi tawh a, Lakhimpur, Dhemaji, Golaghat leh Bongaigoan district pali-a khaw 250 velah tui lian avanga vakvai 3,00,000 vel an awm tawh. Ramhnuaia ramsate pawh tui lian hlauin hmun sang lam an pan.
Asia khawmualpuia lui lian berte zing ami Brahmaputra chu a hlauhawm chin chunglam a luang mek a, kilometre 2,906-a sei he lui hi China rama Tibet-ah kilometre 1,625 a luang a, India ramah kilometre 918 luangin Bangladesh-a kilometre 363 a luan hnuah Bay of Bengal tuifinriatah a luanglut a ni.
West Bengal Purulia leh Bankura district-ah tek tlain mi 6 a deng hlum a, Delhi-ah Yamuna lui a lian mek a, Uttar Pradesh-ah pawh tui a lian mek bawk.
Thulakna: Mizo Aw
