TUNGE?

- Lalthuamliana

The World Was A Market-Place,And People Were Buyers or Sellers. - Sidney Sheldon

02

Mihring a nih leh sakawlh a nih ka thliar thiam chiah lo,mahse hringfa zinga tual leng ve thin zawng a ni ngei mai.Mahni han insawimawi hluai a hreh loh em em danah hian TV commercial (TV-a fakna lemchan) thiltihtheihzia a man chiang hle tih a lang.A neih tak tak aia tam han pholandan a thiam em em a,a hriat aia tam daih a sawi thiam bawk. Chuvangin,vawikhat han inhmuhna mai ah hi chuan mite ngainat a hlawh em em thin a, khuarei ah erawh mi thinhrik a  ni  leh si thin.

A taka a tih ngam tak tak loh tur thil  sawi turin a huaisen tawk reng a,chu chu a chungchuanna tak pawh a ni. Mite chawimawina hlawhtlaka thiltha tih engmah nei lo mahse, amah a inchhuang ve viau mai hi a chawimawitlakna lai tak chu a  ni. A thusawite atanga teh chuan a thil hriat zozai hi tu pa- fa mahin an hre zo ve lawng e tih tur ani a. Mak ve tak mai chu, ama dawtsawi amah vekin a awih ve leh mai thin hi a ni. Miten mi tak ena an en theihnan tan a la nasa a, a hnuah amah leh amah mi tak emaw a inti leh nge nge thin. A tak ram atanga teh erawh chuan a lem leh a der mai a ni tih tun an hai lo thung.

Vanneihtlaktakin nge,vanduaithlak takin kan ti zawk dawn,khawilai pawlhoah te emaw hian hruaitu nihna hi a chelh ve leh hlauh thin.Rawtna leh thurawn tha tak tak hi a phuh chhuak teuh thin a, mahse a thurawt leh rawn angin  thil a tipuitling ngai si lo erawh hi chu a lungchhiatthlak deuh thin.A sawidan hi a nundan ni  tlat hek lo le! "In hruaitu ka ni a, ka sawi hi zawm mai rawh u" a ti sam et thin. Chuvangchuan a lawm,miin tihpuitlin hleih loh tur thu tha sawithiam ber leh mahni zawm lem loh sermon sawithiam ber nihna tangkapui an awrh tir tak nawlh ni!

Amah aia fing leh fel deuh tur mi a hmuh chuan, a thupui ber chu chung mite tan chuan remchanna siam sak loh tawp tur tih hi a ni. "Nangmah cho pha tur che chu an kuhmumah thuai chhum rawh" tih hi a thuvawn a ni ber mai. Chuvangin, a hnunglamah miten "Tualthatpa" tih hming ropuiin an ko thin.

An hlawhtlin theihnan mite chu  harsatna hmachhawn turin a fuih  thin a, amah ber erawh chuan lungte phel tak ngial pawh a chawisawn zuam si lo. Hna pelhe san leh tihtur phat lamah chuan tuma tluk rual loh a ni.Midangte kut hmanga rul kaw zen ching mi a ni a, "Mi thahrui ringin engkim ka ti thei" tiin Paula dungthulin tawngkam mawi tak tak a chher thiam leh mai thin.

A nun chu ama tan chauh a ni a, a hringnun hlapui pawh "Engkim Ka Tan" tih hi a ni.A nun chu hip luh chauh thiam, phuhchhuah nei lo Black Hole ang hi a ni a, a Science hriattamnain a nun a hneh lua deuh te pawh a ni mahna.Chutiangmi a nih avang chuan ama hamthatna tur a awm phawt chuan mi zawng zingah a taima ber thin.A mimal hlawkna tur thil a nih lohva vantlang thatna tur thil ang chiah reng reng tel nan hun a nei lova,a kut leh kein chutianglam hna chu an thawk thiam bawk hek lo.Atana mi pawimawh  ber  chu AMAH hi a ni. Chutiang mi a nihna avanga Pathian hnena lawmthu a sawi thin hi a fakawm, ti rawh u maw? Pathian hnena lawmthu sawi hi a tha si a!!!

Fel leh thiam bera a inchhal tlat avangin tumah a fak thei lo. Fak a hnehin mi tlinlohna zawnchhuah hi a chaw tui ber a ni a, mi relchhiat hi eizawnna nise Bill Gates-a aiin ei a hmu fe zawk ngei ang. Midang hlawhtlinnaah engtiklai mahin a lawmpui ngai lova,mite hlawhchhamnaah lawmna kim a chhar thung thin.

Mi tu emaw tan thil te tham pakhat emaw a tihsak ve chang pawh hian thenawm khawveng leh mi zawng zawng hnenah a tlangzarh a, "Samari Mitha" intiin amah fakna hla chu ring takin a insak sak thin.Nun kawng hruaitua a neih chu midang tihteta mahni intihlen hi a ni.Chuvangin,pawnlang takin mi fak der luam thin mahse a chhungril takah chuan midangte zahthiamna chhete mah a nei lo.

Nimahsela, miten a hnunglama a chanchin an sawidan hi a hriat ve hunah erawh chuan beidawngin a intihlum duh hialin ka ring thin: "A insawi angin a fel lo tawp mai" tih a ni tlat.

 01

Mi pangai leh naran ve tak a ni a,a tih tur chu ti mial mial chi hi a ni. A hnaah a rinawm tihna a ni ber ang chu. Midangte sawisel vak aiin mahni inenfiah hi finthlak a ti zawk a. Mifel ber emaw, mi fel lo ber ah emaw a inchhiar ve lem lo.Amah aia fel leh thiam tamtak an awm ang a, amah tluk  lotu pawh tam tak an awm ang tih a ring mai a ni. Chuvangin, a chunga mite pawh a zahthiam a,a hnuai ami te pawh a lainat thiam bawk thin. Chawimawitlakte chawimawi hi a hreh ngai lova,a tih ngei tur niin a ngai zawk.Mi a fakder hluai ngai lova,thil hi a nihna ang taka sawi thin mi a nih avangin sumdawnna khawvelah chuan a hlawhchham let der mai awm e.

Hmasawn zel tura tan la ngam mi a nih avangin a fel lohna leh tlinlohna te pawm turin a huaisen tawk a,dawta inphatmar leh insawimawi mai a tum ngai lo. A pholan aia tam a kawl a, a sawichhuah aia tam a hre bawk. "Thial rei zawh poh leh a thlum zual ting mai" an tih ang chi  hi a ni. Chuvangin,vawikhat intawhnaah mi rilru kuai lem lo mahse khuareiah a tel lova khawsak a har an tih khawpa mi tangkai a lo ni thin.

Thu a sawi duah lova, a ngawi reng bawk hek lo. A tih tur leh a sawi tur chin hi a hre em em mai a ni.  Amah an zawh loh zawhnaah chhanna a pe ngai lova, mahse a chhan tur zawhna erawh a tlan chhiatsan ngai lo.A thusawiah amah a chiang a, "Sawi tam apiang an fingkher lo" tih chiang takin a hria.

A hringnun chu a mihringpuite tan a nih loh chuan awmzia neiin a hre lova,atan chuan nun hi hringfa leh a chhehvel (environment) tan  hlan chhawn tura Pathian thilpek a ni. Mahni nunna atan midang thisen zuk thinte nunah hlutna a hmu lova, ani duhthusam erawh zawk chu a thisen lum lai ngei hian leilung fate thisen kawng luah khatin chawl lovin luang reng sela tih hi ani.Chutiang rilru pu mi a nih avangin midangte chaklohnaah hlawkna a zawng ve ngai lo.

Thuin dikna a tlangaupui ve vak vak ngai lo va, a thiltihteah dikna chuan aw a chhuah zawk thin. Fakna tawngkam avangin a uanthuan phah ngai lo va,engvang mahin amah leh amah a inphat ngai hek lo.Amah chu amah ni turin a huaisen tawk a ni. Mahni nihna pela lan mawi tum hi zahah a la tlat a, lansarh tuma thil tih hi zahthlak a tih ber thil  a ni.

Hriselna khawih pawi thei khawpa thlum vut chi a ni lova, tidamtu damdawi kha (bitter) anna lai a nei zawk thin. Chuvangin, thuruk hrilhna tlak thianah i neih a sual lo vang.Amah kawp la, i tan hmasawnna khawp zirlai a tling ngei ang.

A thiltih thatte a sawi chhuak cham chi ve ngai lova, a thiltih hmutute sawi atan a khek mai thin.Fakna hlawh duh vang ringawtin thil a ti ngai lova,mihring a nihna anga a tihturte chu a ti mai thin. Ropuina leh chawimawina umin hna a thawk lova, mihring pakhat anihna anga a mawhphurhna hlen chhuah hi a thil ngaih pawimawh ber a ni. Chuvangin, ani hi mihring dik tak darthlalang chu a lo ni e.

A chungchanga sawi ve theih ka neih chu ani zawng tuma hriatzui loh thlan khur thim chhunga a luh  hnuah pawh hringfa khawvel tana a hlutna erawh chu a eng zual zel zawk dawn   tih hi a ni.

Hnunglam atanga miten a chanchin an sawidan chu: "A insawidan aiin a fel daih zawk" tih hi a ni.Hengtiang mite avang hian a ni ngei ang, "Pathianin a thilsiamte chu a en a, tha a ti em em a" tia Genesis ziaktuin a lo sawi kha.
         

00

"Hringnun hi dawrpui a ni a,chuta awmte chu leitute an nih loh vek chuan zuartute an ni" tiin American thawnthu ziakthiam hmingthang Sidney Sheldon-a(1917-2007)  chuan a thawnthu ziah hmasak ber pahnihna, The Other Side of Midnight (1973)-a antagonist Demiris chu a sawi tir a. Ni, hringfate hi chi hniha then theihin kan lo awm a. A chikhatna chu, "A insawi angin a thiam lo" tih turte leh a chihnihna chu, "A insawi ang ai daihin a thiam zawk" tih tur te an ni. Nang, tunge i  nih?