YMA General Conference 2010 Chu Leitlangpui Runah Ropui Taka Tan A Ni Ta

19/10/2010 23:56

YMA General Conference 2010 chu zanin atang in ropui takin Leitlangpui runah tan a ni ta. He Palai Lawm inkhawm nuam tak hi Pu R. Lalngheta, Treasurer, Central YMA- in a kaihruai a, Pu Vanlalsiama, Treasurer, Vaisam Group in Hunserh a hman zawh hnuin hlung taka Programme -te hman chhoh a ni a. Zaipawl zai leh mimal zai mawi tak tak kan ngaithla a, an zaithiam hlawmin beng an ti tlai hle mai. Sound System a tha bawk a, tin kan zaithiam te an lo zaithiam kher bawk a, Leitlangpui Run chu kan nghing dual dual a ni ber e. Zanin palai inkhawmzat hi mi 3000 chuang kan tling a ni.

Tin, Pu P Lalhmangaihzuala, President, Sub-Hqrs YMA, Lunglei in Palai te lawmna thu a sawi a. Palaite min ti phurin Conference kan hman chhoh zel tur atan pawh min ti phur hle a ni. Pu Lalthanliana, Honorable Minister, LAD, etc., Chairman, Organising Committee, 65th YMA General Conference ni bawk pawhin thu a sawi bawk a. A thusawi ropui tak khan thalaiteah chona thar tam tak min pek belh leh a, kan hlawkpui hle mai.

Tin, YMA Hlabu tlangzarh a ni a, Annual Report Pu Lalbiakzuala, General Secretary, Central YMA- in a pe a, YMA in hma kan lakna kawng hrang hrang te min hriattir nawn lehin a ngaihnawm hle mai.Pu J Lalsailova, Finance Secretary, Central YMA pawhin Financial Report a pe bawk a, a report pek a felfai hle a, YMA Member tam tak tan zirtur min chhawp chhuah sak a, kan lawm hle mai.

Tin, Hruaitu hlun chawimawina hun neih a ni bawk a. Hun rei tak chhung YMA te mahni inphata min lo kaihruai tawh tute hmel han hmuh meuh chuan YMA Member te hnenah chona thar nasa takin min pe leh a. Midangte thatna tur atan a nung thin YMA Member ni turin chona thar nasa takin min pe a. Chawimawi phut lo va a thim leh var thlu lova min lo kaihruai thintu kan hruaitu hlun te hmel han hmuh meuh chuan YMA Member pungkhawm te hnenah nasa takin chona thar leh hmabak min chhawpchhuah sak a ni ber e.

Zanin kan Programme hman hi a hlung hle a, YMA Member leh Palai te kan kal tha hle a, kan kal chhan leh YMA Member kan nihna te hrerengin keimahni Conference ngei a ni tih hre reng a, a nawm leh nawm loh pawh keimahni kuta innghat a ni tih hre reng chungin Conference Palai lo kal zawng zawngte a tam thei ang ber kan Programme-ah hian awm tum zel ila, tichuan Conference nuam leh hlung tak kan hmang chho thei zel dawn a ni.

Hriat theih chinah (19/10/1- zan dar 7:00 report-a a lan danin) YMA General Conference 2010 hmang tura kal - Branch 320 thleng tawh in Khawmpui palai hi 3006 an ni tawh a ni.